టైమ్ టాప్-100లో స్మృతి మంధాన సత్తా

భారత మహిళా క్రికెట్ స్టార్ స్మృతి మంధాన మరో అరుదైన గౌరవాన్ని సొంతం చేసుకున్నారు. ప్రతిష్ఠాత్మక టైమ్ మ్యాగజైన్ విడుదల చేసిన ప్రపంచంలోని అత్యంత ప్రభావవంతమైన 100 మంది క్రీడాకారుల జాబితాలో ఆమె చోటు దక్కించుకున్నారు.

ఈ జాబితాలో స్థానం పొందిన ఏకైక భారత క్రీడాకారిణిగా స్మృతి మంధాన నిలవడం విశేషం. అథ్లెట్లు, కోచ్‌లు, ఇన్వెస్టర్లు వంటి ప్రముఖులతో కూడిన ఈ ప్రతిష్ఠాత్మక జాబితాలో ఆమె ఎంపిక కావడం భారత క్రీడా ప్రపంచానికి గర్వకారణంగా మారింది.

ఈ జాబితాలో ప్రపంచ ఫుట్‌బాల్ దిగ్గజం లియోనల్ మెస్సీ, బాస్కెట్‌బాల్ స్టార్ లెబ్రాన్ జేమ్స్ వంటి ప్రముఖ క్రీడాకారులు కూడా చోటు సంపాదించారు.