ఉరుమడ్లలో మత్తు పదార్థాల విక్రయాలపై హెచ్చరిక

ఉరుమడ్లలో మత్తు పదార్థాల విక్రయాలపై హెచ్చరిక

కిరాణా, బెల్ట్‌ షాపుల యజమానులకు గ్రామపంచాయతీ సూచనలు

నల్గొండ జిల్లా | చిట్యాల మండలం | ఉరుమడ్ల | సెప్టెంబర్ 1, 2026

ఉరుమడ్ల గ్రామంలో మత్తు పదార్థాల విక్రయాలను అరికట్టేందుకు గ్రామపంచాయతీ పాలకవర్గం కీలక నిర్ణయం తీసుకుంది. గ్రామంలోని కిరాణా దుకాణాలు, బెల్ట్‌ షాపుల యజమానులు బాధ్యతాయుతంగా వ్యవహరించాలని హెచ్చరిక జారీ చేసింది.

గ్రామంలోని దుకాణాల్లో 18 సంవత్సరాల లోపు పిల్లలకు మాత్రమే కాకుండా 20 సంవత్సరాల లోపు యువతకు కూడా గుట్కా ప్యాకెట్లు, సిగరెట్లు, మద్యం, వైన్ తదితర మత్తు పదార్థాలను విక్రయించరాదని గ్రామపంచాయతీ సూచించింది.

ఎవరైనా నిబంధనలను ఉల్లంఘించి మైనర్లు లేదా యువతకు మత్తు పదార్థాలు విక్రయించినట్లు తెలిసినా, నిర్ధారణ అయినా చట్టపరమైన నిబంధనల ప్రకారం కఠిన చర్యలు తీసుకుంటామని హెచ్చరించింది.

అలాగే గ్రామ ప్రజల ఆరోగ్యం, యువత భవిష్యత్తును దృష్టిలో ఉంచుకుని ఉరుమడ్లలో మత్తు పదార్థాల విక్రయాలను పూర్తిగా అరికట్టేందుకు గ్రామపంచాయతీ పాలకవర్గం తీర్మానం మేరకు చర్యలు చేపట్టనున్నట్లు పేర్కొంది. ముఖ్యంగా బెల్ట్‌ షాపుల ద్వారా మద్యం, ఇతర మత్తు పదార్థాల విక్రయాలను నియంత్రించేందుకు కఠినంగా వ్యవహరించనున్నట్లు తెలిపింది.

కిరాణా, బెల్ట్‌ షాపుల యజమానులందరూ గ్రామపంచాయతీ సూచనలను పాటిస్తూ మత్తు పదార్థాల విక్రయాలను ప్రోత్సహించకుండా సహకరించాలని కోరారు. ముఖ్యంగా 20 సంవత్సరాల లోపు యువతకు ఎట్టి పరిస్థితుల్లోనూ మత్తు పదార్థాలు విక్రయించవద్దని స్పష్టం చేశారు.

యువతను మత్తు పదార్థాలకు దూరంగా ఉంచి ఆరోగ్యకరమైన వాతావరణాన్ని గ్రామంలో నెలకొల్పేందుకు ప్రజలు, వ్యాపారులు సహకరించాలని గ్రామపంచాయతీ పాలకవర్గం విజ్ఞప్తి చేసింది.

— ఉరుమడ్ల గ్రామపంచాయతీ పాలకవర్గం