వాహన్–సారథి సాఫ్ట్వేర్ నిలిచిపోవడంతో రవాణా సేవలకు అంతరాయం
హైదరాబాద్: తెలంగాణ వ్యాప్తంగా వాహన్ (Vahan), సారథి (Sarathi) సాఫ్ట్వేర్ సేవలు అకస్మాత్తుగా నిలిచిపోవడంతో రవాణా శాఖ సేవలకు తీవ్ర అంతరాయం ఏర్పడింది. దీంతో రాష్ట్రంలోని ఆర్టీఏ కార్యాలయాల్లో ప్రజలు ఇబ్బందులు ఎదుర్కొంటున్నారు.
డ్రైవింగ్ లైసెన్స్లు, వాహన రిజిస్ట్రేషన్లు, ఫిట్నెస్ సర్టిఫికెట్లు, యాజమాన్య మార్పిడి వంటి కీలక సేవలు నిలిచిపోవడంతో కార్యాలయాలకు వచ్చిన ప్రజలు గంటల తరబడి క్యూలైన్లలో వేచి ఉండాల్సిన పరిస్థితి ఏర్పడింది.
సాంకేతిక లోపం కారణంగానే వ్యవస్థ నిలిచిపోయిందని రవాణా శాఖ అధికారులు తెలిపారు. సమస్యను పరిష్కరించేందుకు సాంకేతిక బృందాలు చర్యలు చేపట్టాయని, సేవలు పూర్తిస్థాయిలో పునరుద్ధరించడానికి కొంత సమయం పట్టే అవకాశం ఉందని వెల్లడించారు.
సాఫ్ట్వేర్ పునరుద్ధరణ అనంతరం అన్ని సేవలు యథావిధిగా అందుబాటులోకి వస్తాయని అధికారులు తెలిపారు. ప్రజలు ఆందోళన చెందవద్దని, కొంత సమయం తర్వాత కార్యాలయాలను సందర్శించాలని సూచించారు.
