వర్షాల కోసం రాజవరం గ్రామంలో నగర సంకీర్తన.. గోమాత ఫోటోలు, హనుమాన్ చాలీసా పుస్తకాల పంపిణీ

ఎన్టీఆర్ జిల్లా తిరువూరు నియోజకవర్గం గంపలగూడెం మండలం రాజవరం గ్రామంలో లోకం సుభిక్షంగా ఉండాలని, సమృద్ధిగా వర్షాలు కురవాలని ఆకాంక్షిస్తూ ఆదివారం భక్తిశ్రద్ధలతో నగర సంకీర్తన నిర్వహించారు.

ఆంజనేయస్వామి ఆలయం నుంచి ప్రారంభమైన నగర సంకీర్తనలో భక్తులు "శ్రీరామ.. జయ రామ.. జయ జయ రామ" నామస్మరణ చేస్తూ గ్రామంలోని ప్రధాన వీధుల గుండా ప్రదర్శన నిర్వహించారు. అనంతరం గ్రామ దేవత ముత్యాలమ్మ ఆలయం, బొడ్రాయి, వెంకటేశ్వరస్వామి ఆలయాల్లో ప్రత్యేక పూజలు నిర్వహించి లోకకల్యాణం, సకాలంలో వర్షాలు కురవాలని ప్రార్థనలు చేశారు.

తదుపరి గంపలగూడెం దాత కుందా కోటేశ్వరావు అందజేసిన గోమాత ఫోటోలు, హనుమాన్ చాలీసా పుస్తకాలను భక్తులకు పంపిణీ చేశారు. అనంతరం తీర్థ ప్రసాదాలను అందజేశారు.

ఈ కార్యక్రమంలో సత్యసాయి సేవా కమిటీ ఆర్గనైజర్ పారేపల్లి కృష్ణారావు, గ్రామ మాజీ సర్పంచులు అబ్బూరి వెంకటయ్య, చెన్నుపాటి నరసింహారావు, మెట్టగుట్ట దేవస్థానం కమిటీ కార్యదర్శి మన్నె నరసింహమూర్తి, విశ్వహిందూ పరిషత్ జిల్లా అధ్యక్షుడు నేరెళ్ల యుగంధర్, జిల్లా సమన్వయకర్త అన్నవరపు కాంతికుమార్, సహకార సంఘ మాజీ అధ్యక్షుడు బండారుపల్లి వెంకట నరసయ్య, సాయిబాబా కమిటీ సభ్యులు వై. జగన్నాథం, తొండపు శ్రీను, సుగ్గల ప్రసాద్, మన్నె లక్ష్మణ్‌తో పాటు గ్రామస్థులు, భక్తులు పెద్ద సంఖ్యలో పాల్గొన్నారు.