యూరప్‌లో రోడ్లు కరుగుతున్నాయి.. భారత్‌లో ఎందుకు కాదు?

 యూరప్‌లో తీవ్ర వడగాల్పుల ప్రభావంతో బ్రిటన్, జర్మనీ, ఫ్రాన్స్ వంటి దేశాల్లో రోడ్లు కరిగిపోతున్న దృశ్యాలు సోషల్ మీడియాలో వైరల్ అవుతున్నాయి. మరోవైపు భారత్‌లో ఉత్తరప్రదేశ్, రాజస్థాన్, ఢిల్లీ వంటి రాష్ట్రాల్లో ప్రతి ఏడాది 45 నుంచి 48 డిగ్రీల సెల్సియస్ వరకు ఉష్ణోగ్రతలు నమోదవుతున్నప్పటికీ రోడ్లు కరగడం కనిపించదు. దీంతో యూరప్ రోడ్ల నాణ్యతపై సందేహాలు వ్యక్తమవుతున్నాయి. అయితే దీనికి కారణం రోడ్ల నాణ్యత కాదు.. ఆయా దేశాల వాతావరణ పరిస్థితులకు అనుగుణంగా ఉపయోగించే నిర్మాణ సాంకేతికత.

యూరప్‌లో రోడ్లు ఎందుకు కరుగుతున్నాయి?

యూరప్, యూకే దేశాల్లో రోడ్లను ప్రధానంగా తీవ్రమైన చలి, మంచును తట్టుకునేలా రూపొందిస్తారు. అక్కడ చలికాలంలో ఉష్ణోగ్రతలు సున్నా డిగ్రీల కంటే తక్కువకు పడిపోతాయి. ఈ పరిస్థితుల్లో రోడ్లు పగుళ్లు రాకుండా ఉండేందుకు ‘సాఫ్ట్ బిట్యూమెన్’ (మెత్తని తారు)ను ఉపయోగిస్తారు. అయితే ప్రస్తుతం ఏర్పడిన అసాధారణ హీట్‌వేవ్‌ల కారణంగా ఈ మెత్తని తారు అధిక ఉష్ణోగ్రతలను తట్టుకోలేక కరిగిపోతోంది.

భారత్‌లో రోడ్లు ఎందుకు కరగవు?

భారతదేశంలో ప్రధాన సవాలు తీవ్రమైన ఎండలు. అందుకే ఇక్కడి రోడ్లను అధిక ఉష్ణోగ్రతలను తట్టుకునే విధంగా నిర్మిస్తారు.

• VG-30, VG-40 గ్రేడ్ బిట్యూమెన్: భారతీయ రోడ్ల నిర్మాణంలో గట్టిగా ఉండే తారు వాడతారు. ఇది అధిక వేడిలో కూడా తన బలాన్ని కోల్పోదు.

• ప్రత్యేక మెటీరియల్ మిశ్రమం: పెద్ద రాళ్లు, గ్రిట్‌ను ఉపయోగించడం వల్ల రోడ్లు అధిక ఉష్ణోగ్రతల వద్ద కూడా బలహీనపడవు.

• అధిక విస్కాసిటీ: భారతీయ తారు గాఢత ఎక్కువగా ఉండటంతో 45 డిగ్రీలకుపైగా ఉష్ణోగ్రతలు నమోదైనా, భారీ వాహనాలు సంచరించినా రోడ్లు సులభంగా కరగవు లేదా గుంతలు పడవు.

అసలు కారణం ఇదే

యూరప్‌లోని రోడ్లు చలికి అనుగుణంగా, భారతదేశంలోని రోడ్లు ఎండకు అనుగుణంగా నిర్మించబడతాయి. ప్రస్తుతం గ్లోబల్ వార్మింగ్ కారణంగా యూరప్‌లో నమోదవుతున్న అసాధారణ వడగాల్పులు అక్కడి రోడ్లపై తీవ్ర ప్రభావం చూపుతున్నాయి. అందుకే అక్కడ రోడ్లు కరిగిపోతుండగా, భారత్‌లో అదే పరిస్థితి కనిపించడం లేదు.