www.ntodaynews.com
ఓటరు ‘క్వార్టర్’గా మారిన సంస్కృతి?
తెలంగాణ
ఓటరు ‘క్వార్టర్’గా మారిన సంస్కృతి?
మున్సిపల్ ఎన్నికల్లో డబ్బు పంపిణీ ఆరోపణలపై చర్చ
NTODAY NEWS: చిట్యాల
మున్సిపల్ ఎన్నికల నేపథ్యంలో చిట్యాల పట్టణంలో డబ్బు పంపిణీ జరిగినట్లు ఆరోపణలు జోరుగా సాగుతోంది. పట్టణంలోని 12 వార్డుల్లో అధికార, ప్రతిపక్ష పార్టీల అభ్యర్థులు ఓటర్లను ఆకర్షించేందుకు భారీగా ఖర్చు చేశారనే ఆరోపణలు వినిపిస్తున్నాయి. ఒక్కో ఓటరికి రూ.5,000 నుంచి రూ.10,000 వరకు నగదు అందించారన్న సమాచారం స్థానికంగా చర్చనీయాంశమైంది. అయితే ఈ ఆరోపణలకు సంబంధించి అధికారికంగా ఎలాంటి ధృవీకరణ లేదు.
డబ్బున్నవారికే అధికారం?
ఎన్నికల్లో పెరుగుతున్న ఖర్చులు సాధారణ వ్యక్తులకు పోటీ చేయడం కష్టతరం చేస్తున్నాయని పలువురు అభిప్రాయపడుతున్నారు. అధికంగా ఖర్చు చేయగల అభ్యర్థులకే ఆధిక్యం దక్కుతోందన్న భావన వ్యక్తమవుతోంది. ఈ ధోరణి కొనసాగితే భవిష్యత్తులో సామాన్యుల రాజకీయ ప్రవేశానికి అడ్డంకులు ఏర్పడే అవకాశం ఉందని విశ్లేషకులు అంటున్నారు.
కాలనీల్లో చర్చల హోరు
ఎన్నికల సమయంలో నగదు, బహుమతుల పంపిణీపై కాలనీల్లో విస్తృత చర్చలు జరిగాయని సమాచారం. “మీ ఇంటికి వచ్చారా?”, “ఎంత ఇచ్చారు?” వంటి ప్రశ్నలు వినిపించాయనే వాదనలు ఉన్నాయి. కొన్ని ప్రాంతాల్లో నగదు పంపిణీ జరిగిందని, మరికొన్ని చోట్ల వస్తువుల రూపంలో బహుమతులు అందించారనే ప్రచారం ఉంది. సుదూర ప్రాంతాల నుంచి వచ్చే ఓటర్ల ప్రయాణ ఖర్చులను కూడా అభ్యర్థులే భరించారన్న సమాచారం వినిపిస్తోంది.
ప్రజాస్వామ్య విలువలపై ఆందోళన
ఎన్నికల సమయంలో డబ్బు, మద్యం పంపిణీ ఆరోపణలు ప్రజాస్వామ్య విలువలను ప్రశ్నార్థకంగా మారుస్తున్నాయని రాజకీయ విశ్లేషకులు అభిప్రాయపడుతున్నారు. గత కొన్నేళ్లుగా ఈ ధోరణి సాధారణమైందని, ఓటర్లలో ఆధారపడే మనస్తత్వం పెరుగుతోందని వారు సూచిస్తున్నారు.
ఓటు విలువను కాపాడాలి
ప్రజాస్వామ్యంలో ఓటు హక్కు అమూల్యమైనదని, ప్రలోభాలకు లొంగకుండా అభ్యర్థుల పనితీరు, సామర్థ్యాన్ని పరిశీలించి ఓటు వేయాలని మేధావులు సూచిస్తున్నారు. లేకపోతే భవిష్యత్తులో ప్రజాస్వామ్య వ్యవస్థపై ప్రతికూల ప్రభావం పడే ప్రమాదం ఉందని హెచ్చరిస్తున్నారు.
గమనిక: పై ఆరోపణలపై అధికారికంగా ఎలాంటి ధృవీకరణ లభించలేదు.
కునూరు మధు
9848581856
#MunicipalElections
#ElectionNews
#VoteForDemocracy
#ElectoralEthics
#CashForVotes
#DemocracyInDanger
#TelanganaPolitics
#LocalElections
#ElectionWatch
Follow us on
Website
Facebook
Instagram
YouTube 
