బీఆర్ఎస్లోకి జీవన్ రెడ్డి జగిత్యాలలో నూతన రాజకీయ అధ్యాయం
బీఆర్ఎస్లోకి జీవన్ రెడ్డి: జగిత్యాలలో నూతన రాజకీయ అధ్యాయం
- కేసీఆర్ నాయకత్వంలో పనిచేయడం సంతోషకరం: మాజీ మంత్రి జీవన్ రెడ్డి
- జీవన్ రెడ్డి రాక పార్టీకి కొండంత అండ: మాజీ జెడ్పీ చైర్పర్సన్ దావ వసంత, వైస్ చైర్మన్ హరిచరణ్ రావు
జగిత్యాల, ఏప్రిల్ 14 (న్యూస్):
జగిత్యాల రాజకీయాల్లో పెను మార్పు చోటుచేసుకుంది. సీనియర్ నాయకులు, మాజీ మంత్రి జీవన్ రెడ్డి బిఆర్ఎస్ పార్టీలో చేరడంపై జిల్లా రాజకీయ వర్గాల్లో ఆసక్తి నెలకొంది. మంగళవారం జగిత్యాల పట్టణంలోని జెడ్పీ వైస్ చైర్మన్ హరిచరణ్ రావు నివాసంలో ఏర్పాటు చేసిన అల్పాహార విందులో జీవన్ రెడ్డి బిఆర్ఎస్ నాయకులతో కలిసి పాల్గొన్నారు.
కేసీఆర్తో ప్రయాణం నూతన అధ్యాయం: జీవన్ రెడ్డి
ఈ సందర్భంగా జీవన్ రెడ్డి మాట్లాడుతూ.. ముఖ్యమంత్రి కేసీఆర్తో తన ప్రయాణం రాజకీయంగా ఒక నూతన అధ్యాయమని పేర్కొన్నారు. "తెలంగాణ ఉద్యమ సారథిగా పోరాడిన కేసీఆర్తో నా అనుబంధం ఇప్పటిది కాదు. గతంలో రాజకీయ అనివార్యత వల్ల ఆయనపై పోటీ చేసినా, ప్రస్తుత పరిస్థితుల్లో కాంగ్రెస్ పార్టీని వీడాల్సి వచ్చింది. తెలంగాణ పునర్నిర్మాణం కోసం కేసీఆర్ దశాబ్ద కాలంగా ఎంతో కృషి చేశారు. రైతు సంక్షేమం కోసం రైతు బంధు, రైతు బీమా వంటి పథకాలు తెచ్చిన ఘనత ఆయనదే" అని కొనియాడారు.
ప్రస్తుత ప్రభుత్వంపై విమర్శలు చేస్తూ.. మేడిగడ్డ మరమ్మతులు చేపట్టకుండా కేసీఆర్ను దోషిగా చూపే ప్రయత్నం చేస్తున్నారని, కరువు వస్తే రేవంత్ రెడ్డే బాధ్యత వహించాలని హెచ్చరించారు. "రేవంత్ పోవాలి.. కేసీఆర్ రావాలి" అనే భావన ప్రజల్లో బలంగా ఉందని, జగిత్యాల నుండే కేసీఆర్ జైత్రయాత్ర మొదలవుతుందని ధీమా వ్యక్తం చేశారు.
జీవన్ రెడ్డి రాక అదృష్టం: బిఆర్ఎస్ నాయకులు
మాజీ జెడ్పీ చైర్పర్సన్ దావ వసంత సురేష్, జెడ్పీ వైస్ చైర్మన్ హరిచరణ్ రావు, పురుషోత్తం రావు మాట్లాడుతూ.. నిస్వార్థంగా సేవ చేసే జీవన్ రెడ్డి వంటి గొప్ప నాయకుడు బిఆర్ఎస్ పార్టీలోకి రావడం తమకు అదృష్టమని, ఆయనకు పూర్తి స్థాయిలో సహకరిస్తామని తెలిపారు. జీవన్ రెడ్డి రాకతో జిల్లాలో పార్టీకి కొండంత అండ లభించిందని వారు ఆనందం వ్యక్తం చేశారు.
ఈ కార్యక్రమంలో బిఆర్ఎస్ పార్టీ ముఖ్య నాయకులు, కార్యకర్తలు మరియు జీవన్ రెడ్డి అభిమానులు పెద్ద సంఖ్యలో పాల్గొని ఆయనకు ఘన స్వాగతం పలికారు.
