కృష్ణా జలాశయాలపై ఖరీఫ్ ఆశలు.. ఎగువ వర్షాలకే ఎదురుచూపు

తెలుగు రాష్ట్రాల సాగు, తాగునీటి అవసరాలకు కీలకమైన కృష్ణా బేసిన్ ప్రాజెక్టుల్లో ఎట్టకేలకు వరద ప్రవాహం మొదలైంది. ఎల్‌నినో ప్రభావంతో జూన్‌లో ఆశించిన స్థాయిలో వర్షాలు కురవకపోవడంతో ఖరీఫ్ సీజన్ ప్రారంభమై 40 రోజులు గడిచినా ప్రధాన జలాశయాలు నీరసంగా కనిపించాయి. దీంతో రైతుల్లో ఆందోళన నెలకొంది.

ఇటీవల మహారాష్ట్ర, కర్ణాటక ఎగువ ప్రాంతాల్లో కురుస్తున్న భారీ వర్షాలు పరిస్థితిని కొంతమేర మార్చుతున్నాయి. అల్మట్టి జలాశయానికి వరద నీరు చేరుతుండటంతో, అదే ప్రవాహం కొనసాగితే జూరాల, శ్రీశైలం, నాగార్జునసాగర్ ప్రాజెక్టులకు కూడా నీటి రాక పెరిగే అవకాశం ఉందని అధికారులు భావిస్తున్నారు.

జూన్ నెల నిరాశపరిచినప్పటికీ, జూలై–ఆగస్టులో విస్తారంగా వర్షాలు కురిస్తేనే కృష్ణా బేసిన్ ప్రాజెక్టులు నిండడంతో పాటు ఖరీఫ్ సాగుకు అవసరమైన నీటి లభ్యత మెరుగుపడుతుందని నిపుణులు చెబుతున్నారు. ప్రస్తుతం కర్ణాటక జలాశయాల్లోకి వస్తున్న వరదలపైనే తెలుగు రాష్ట్రాల రైతుల ఆశలు నిలిచాయి.