పేదవాడికి సర్కారు వైద్యం చేరువవ్వడమే ప్రభుత్వ లక్ష్యం

పేదవాడికి ‘సర్కారు’ వైద్యం చేరువవ్వడమే ప్రభుత్వ లక్ష్యం: మంత్రి అడ్లూరి లక్ష్మణ్ కుమార్

​నంది మేడారంలో 30 పడకల సామాజిక ఆరోగ్య కేంద్రాన్ని ప్రారంభించిన మంత్రి

​ధర్మారం:

పేద ప్రజలకు నాణ్యమైన వైద్యాన్ని ఉచితంగా అందించడమే రాష్ట్ర ప్రభుత్వ ప్రధాన లక్ష్యమని రాష్ట్ర సాంఘిక సంక్షేమ శాఖ మంత్రి అడ్లూరి లక్ష్మణ్ కుమార్ అన్నారు. పెద్దపల్లి జిల్లా ధర్మారం మండలం నంది మేడారంలో నూతనంగా నిర్మించిన 30 పడకల సామాజిక ఆరోగ్య కేంద్రాన్ని (CHC) జిల్లా కలెక్టర్ కోయ శ్రీహర్షతో కలిసి మంత్రి శుక్రవారం ప్రారంభించారు.

​రాజకీయ జన్మనిచ్చిన గడ్డ: ధర్మారం మండలం తనకు రాజకీయంగా జన్మనిచ్చిందని, 2006లో తనను జెడ్పీటీసీగా గెలిపించిన ఈ ప్రాంతంపై తనకు ప్రత్యేక అభిమానం ఉందని మంత్రి గుర్తుచేసుకున్నారు. నియోజకవర్గంలోని ఏడు మండలాల్లో ధర్మారం అభివృద్ధికి ప్రత్యేక నిధులు కేటాయిస్తానని హామీ ఇచ్చారు.

​వైద్యం, విద్యకు ప్రాధాన్యం: రాష్ట్ర ప్రభుత్వం విద్య మరియు వైద్య రంగాలకు ప్రథమ ప్రాధాన్యత ఇస్తోందని, అందులో భాగంగానే మేడారంలో ఈ ఆసుపత్రిని అందుబాటులోకి తెచ్చామని తెలిపారు.

​మెరుగైన సేవలు: ఆసుపత్రిలో వైద్యులు, మందుల కొరత లేకుండా చూస్తామని, ప్రజలు ప్రైవేట్ ఆసుపత్రులకు వెళ్లి ఆర్థికంగా నష్టపోకుండా ప్రభుత్వ సేవలను వినియోగించుకోవాలని కోరారు.

​అధికారులకు ఆదేశాలు: ఆసుపత్రిలో పారిశుద్ధ్యం కోసం ప్రత్యేక ఏజెన్సీని ఏర్పాటు చేయాలని, కలెక్టర్ మరియు వైద్య ఆరోగ్య శాఖ అధికారులు క్రమం తప్పకుండా తనిఖీలు నిర్వహించి సేవల నాణ్యతను పర్యవేక్షించాలని ఆదేశించారు.

​దాతలకు అభినందనలు: ఆసుపత్రి నిర్మాణం కోసం స్థలాన్ని విరాళంగా ఇచ్చిన దాతలను మంత్రి ఈ సందర్భంగా ప్రత్యేకంగా అభినందించారు.

​కాంగ్రెస్ కార్యకర్తల గురించి కేటీఆర్ మాట్లాడటం విడ్డూరంగా ఉందని మంత్రి అడ్లూరి విమర్శించారు. పదేళ్ల పాలనలో కేవలం కేసీఆర్ కుటుంబ సభ్యులకే ఉద్యోగాలు వచ్చాయని, ఉద్యమకారులను, కార్యకర్తలను బీఆర్ఎస్ ప్రభుత్వం గాలికొదిలేసిందని మండిపడ్డారు. నాడు "గులాబీ" పాలనలో కార్యకర్తలకు జరిగిన అన్యాయాన్ని ప్రజలు మర్చిపోలేదని ఆయన ఎద్దేవా చేశారు.

ఈ కార్యక్రమంలో నంది మేడారం సర్పంచ్ వీర్ పాల్, స్థలదాత నర్సింగరావు, వైద్య ఆరోగ్య శాఖ అధికారులు మరియు ప్రజాప్రతినిధులు పాల్గొన్నారు