పెద్దకాపర్తి జెడ్పీహెచ్ఎస్ పాఠశాలలో జాతీయ నులిపురుగుల నివారణ దినోత్సవం
నల్గొండ జిల్లా చిట్యాల మండలం పెద్దకాపర్తి జిల్లా పరిషత్ ఉన్నత పాఠశాల లో జాతీయ నులిపురుగుల నివారణ దినోత్సవాన్ని నిర్వహించారు. ఈ కార్యక్రమాన్ని గ్రామ సర్పంచ్ కాటం వెంకటేశం, ఉపసర్పంచ్ ఓర్సు సైదులు ముఖ్య అతిథులుగా విచ్చేసి అధికారికంగా ప్రారంభించారు. ఈ సందర్భంగా సర్పంచ్ కాటం వెంకటేశం మాట్లాడుతూ, పిల్లల ఆరోగ్య సంరక్షణలో నులిపురుగుల నివారణ మాత్రలు ఎంతో కీలక పాత్ర పోషిస్తాయన్నారు. విద్యార్థులు ఆరోగ్యంగా ఉన్నప్పుడే చదువుల్లో రాణించగలరని, అందుకే ప్రభుత్వం ప్రతిష్టాత్మకంగా చేపడుతున్న ఈ కార్యక్రమాన్ని అందరూ సద్వినియోగం చేసుకోవాలని కోరారు. అనంతరం పాఠశాల ప్రధానోపాధ్యాయులు శ్రీధర్ మాట్లాడుతూ విద్యార్థులలో రక్తహీనతను నివారించడానికి, వారి శారీరక, మానసిక ఎదుగుదలకు ఈ మాత్రలు ఎంతో దోహదపడతాయని వివరించారు. ఉపాధ్యాయుల పర్యవేక్షణలో విద్యార్థులందరికీ ఈ మాత్రలను పంపిణీ చేశారు. ఈ కార్యక్రమంలో హెల్త్ సూపర్ వైజర్ లక్ష్మి , శ్రీనివాస్ , పాఠశాల ఉపాధ్యాయ బృందం, వైద్య సిబ్బంది మరియు విద్యార్థులు పాల్గొన్నారు.
