టాప్‌–5 నియోజకవర్గాల్లో గోపాలపురం
టీడీపీ కార్యక్రమాల అమలులో ఉత్తమ ప్రతిభ.. సీఎం చంద్రబాబు ప్రశంసలు
గోపాలపురం | Ntoday News
రాష్ట్రంలోని 175 నియోజకవర్గాల్లో తెలుగుదేశం పార్టీ కార్యక్రమాల అమలులో ఉత్తమ ప్రతిభ కనబరిచిన టాప్‌–5 నియోజకవర్గాల్లో గోపాలపురం నియోజకవర్గం నిలిచింది.
సోమవారం తెలుగుదేశం పార్టీ కేంద్ర కార్యాలయంలో నిర్వహించిన టీడీపీ లీడర్స్‌ కాంక్లేవ్‌లో ముఖ్యమంత్రి నారా చంద్రబాబు నాయుడు ఈ విషయాన్ని వెల్లడించినట్లు పార్టీ వర్గాలు తెలిపాయి.
ఈ సందర్భంగా గోపాలపురం ఎమ్మెల్యే మద్దిపాటి వెంకట రాజు కృషిని సీఎం చంద్రబాబు నాయుడు ప్రశంసించారు. నియోజకవర్గంలో పార్టీ కార్యక్రమాలను విజయవంతంగా నిర్వహించేందుకు అనుసరించిన విధానం, ఆలోచనలు, ప్రణాళికలు, వాటిని క్షేత్రస్థాయిలో అమలు చేసిన తీరును ఇతర నాయకులకు వివరించాలని ఎమ్మెల్యేను కోరారు.
సీఎం సూచన మేరకు ఎమ్మెల్యే మద్దిపాటి వెంకట రాజు గోపాలపురం నియోజకవర్గంలో పార్టీ కార్యక్రమాల నిర్వహణకు అనుసరించిన ప్రణాళికలు, కార్యకర్తల భాగస్వామ్యం, కార్యక్రమాల అమలు తీరును కాంక్లేవ్‌లో పాల్గొన్న నాయకులకు వివరించారు.
రాష్ట్రస్థాయిలో టాప్‌–5లో గోపాలపురం నియోజకవర్గం నిలవడం పట్ల టీడీపీ నాయకులు, కార్యకర్తలు హర్షం వ్యక్తం చేస్తున్నారు.
